सार्वजनिक प्रतिबद्धता पूरा गर्न सरकार असफल : भीष्मराज आङ्देम्बे

प्रमुख प्रतिपक्षी दल नेपाली कांग्रेस संसदीय दलका नेता भीष्मराज आङ्देम्बेले सुकुमवासी बस्तीबाट स्थानान्तरण गरिएका नागरिकको व्यवस्थापनप्रति सरकारको कार्यशैलीमाथि गम्भीर प्रश्न उठाएका छन्। उनले सुरक्षित आवासको सुनिश्चितता गर्ने सरकारी प्रतिबद्धता व्यवहारमा कार्यान्वयन नभएको आरोप लगाएका छन्।

आइतबार सामाजिक सञ्जालमार्फत प्रतिक्रिया दिँदै आङ्देम्बेले प्रधानमन्त्री बालेन्द्र शाह (बालेन) ले यसअघि जोखिमयुक्त क्षेत्रमा बसोबास गरिरहेका नागरिकलाई सुरक्षित र व्यवस्थित स्थानमा स्थानान्तरण गरिने सार्वजनिक प्रतिबद्धता जनाएको स्मरण गराएका छन्। उनले उक्त प्रतिबद्धता अहिले कार्यान्वयन भएको नदेखिएको भन्दै प्रधानमन्त्रीसँग स्पष्ट जवाफ मागेका छन्।

कीर्तिपुरस्थित होल्डिङ सेन्टर डुबानमा परेपछि त्यहाँ आश्रय लिएका सुकुमवासीहरू थप समस्यामा परेको उल्लेख गर्दै उनले सरकारले जोखिम न्यूनीकरण गर्नुको सट्टा नागरिकलाई अर्को संकटमा पुर्‍याएको दाबी गरेका छन्। उनका अनुसार सुरक्षित आश्रयको अपेक्षामा रहेका परिवारहरू अहिले पानी, हिलो, खाद्यान्न अभाव र असुरक्षाबीच जीवन बिताउन बाध्य छन्।

आङ्देम्बेले यो अवस्थालाई राज्यको गैरजिम्मेवारी, संवेदनशीलताको अभाव र कमजोर प्रशासनिक व्यवस्थापनको उदाहरणका रूपमा व्याख्या गरेका छन्। उनले सुकुमवासी नागरिकसँग गरिएको सार्वजनिक प्रतिबद्धता पूरा गर्न सरकार असफल भएको टिप्पणी गरेका छन्।

त्यसैगरी, होल्डिङ सेन्टरमा पुगेका पीडितहरूको अवस्था बुझ्न र सरकारसँग जवाफ माग्न गएका युवाहरू, माजिद अन्सारीसहित केही व्यक्तिलाई नियन्त्रणमा लिएको घटनाप्रति पनि उनले आपत्ति जनाएका छन्। लोकतान्त्रिक व्यवस्थामा प्रश्न उठाउनु नागरिकको अधिकार भएको उल्लेख गर्दै त्यसलाई नियन्त्रण गर्ने प्रयास अभिव्यक्ति स्वतन्त्रतामाथिको हस्तक्षेप भएको उनको भनाइ छ।

समापनमा आङ्देम्बेले प्रधानमन्त्री शाहलाई सुकुमवासी नागरिकसँग गरिएको प्रतिबद्धताबारे स्पष्ट जवाफ दिन आग्रह गर्दै नागरिकसँग गरिएका वाचा पूरा भए वा नभएको आधारमै इतिहासले मूल्यांकन गर्ने बताएका छन्।