‘कुनै पनि शक्तिको प्रभावले हाम्रो सार्वभौमिकता र स्वतन्त्र निर्णय क्षमतालाई ओझेलमा पार्न नदिऔँ’

महानायक राजेश हमालले सरकारको सय दिने कार्यकालको मूल्यांकन भाषणमा नभई काम र परिणामका आधारमा हुनुपर्ने बताएका छन्। सामाजिक सञ्जालमार्फत उनले सरकारले जनताको अपेक्षाअनुसार जवाफदेहिता, रोजगारी, न्याय र सुशासनमा ध्यान दिनुपर्ने उल्लेख गरेका हुन्।

उनले भनेका छन्, ‘कुनै पनि सरकारको पहिलो सय दिनको मूल्यांकन केवल उसका प्रतिबद्धता वा घोषणाहरूका आधारमा होइन, उसले लिएको दिशा र जनतासामु प्रस्तुत गरेका परिणामका आधारमा हुनुपर्छ। आज नेपाली जनताले भाषणभन्दा बढी जवाफदेहिता, रोजगारी, न्याय र सुशासनको अपेक्षा गरेका छन्।’

हमालले नेपाल सधैँ राष्ट्रिय हितबाट निर्देशित हुनुपर्नेमा जोड दिँदै कुनै पनि शक्तिको प्रभावले सार्वभौमिकतालाई ओझेलमा पार्न नहुने तर्क गरेका छन्। उनले युवा आन्दोलनले जनताको असन्तुष्टि र परिवर्तनको चाहना देखाएको भन्दै हिंसा र आगजनी लोकतन्त्रको भाषा हुन नसक्ने बताए। उनले थपे, ‘आफ्नो लोकतान्त्रिक अधिकारको प्रयोग गर्ने सम्मानका पात्र हुन्, तर अपराध गर्ने जोसुकै भएपनि निष्पक्ष रूपमा कानुनी दायरामा ल्याइनुपर्छ।’

साथै, राष्ट्रको वास्तविक शक्ति संस्था बलियो बनाउनु, विधिको शासन सुदृढ गर्नु र दलगत राजनीतिभन्दा माथि नेपाललाई राख्नुमा निहित रहने उनको भनाइ छ। उनले सबैलाई विवेकशील र एकताबद्ध भई देश निर्माणमा लाग्न आग्रह समेत गरेका छन्।

हेर्नुस् उनको फेबसकु स्टाटस
कुनै पनि सरकारको पहिलो सय दिनको मूल्यांकन केवल उसका प्रतिबद्धता वा घोषणाहरूका आधारमा होइन, उसले लिएको दिशा र जनतासामु प्रस्तुत गरेका परिणामका आधारमा हुनुपर्छ। आज नेपाली जनताले भाषणभन्दा बढी जवाफदेहिता, रोजगारी, न्याय र सुशासनको अपेक्षा गरेका छन्।
शक्तिशाली राष्ट्रहरूको रणनीतिक प्रतिस्पर्धाले प्रभावित आजको विश्वमा नेपाल सधैँ आफ्नो राष्ट्रिय हितबाट निर्देशित हुनुपर्छ। हामी सबैसँग मित्रताको हात बढाऔँ, तर कुनै पनि शक्तिको प्रभावले हाम्रो सार्वभौमिकता र स्वतन्त्र निर्णय क्षमतालाई ओझेलमा पार्न नदिऔँ।
हालैको युवा आन्दोलनले जनताभित्र रहेको वास्तविक असन्तुष्टि र परिवर्तनको आकांक्षालाई उजागर गरेको छ। शान्तिपूर्ण विरोध लोकतन्त्रको प्राण हो, तर हिंसा र आगजनी लोकतन्त्रको भाषा हुन सक्दैन। आफ्नो लोकतान्त्रिक अधिकारको प्रयोग गर्नेहरू सम्मानका पात्र हुन्, तर अपराध गर्ने जोसुकै भएपनि निष्पक्ष रूपमा कानुनी दायरामा ल्याइनुपर्छ।
राष्ट्रको वास्तविक शक्ति संस्थाहरूलाई सबल बनाउनुमा, विधिको शासनलाई सुदृढ गर्नुमा, र दलगत राजनीतिभन्दा माथि नेपाललाई राख्न सक्नुमा निहित हुन्छ।
आउनुहोस्, हामी विवेकशील बनौँ, एकताबद्ध रहौँ, र यस्तो नेपालको निर्माणमा समर्पित बनौँ जहाँ विभाजनमाथि विवेकको विजय होस्, र जहाँ कुनै पनि राजनीतिक विचारधाराप्रतिको निष्ठाभन्दा नेपालप्रतिको हाम्रो प्रेम अझ महान् होस्।