पोखरामा एनएसजेएफ पल्सर स्पोर्ट्स अवार्ड‚ उत्कृष्ट खेलाडीलाई मोटरसाइकल

काठमाडौँ। जेन-जी आन्दोलनका कारण स्थगित एनएसजेएफ पल्सर स्पोर्ट्स अवार्डको २२औँ संस्करण अर्को साता अर्थात् २३ पुसमा पोखरामा हुने भएको छ।

आयोजक नेपाल खेलकुद पत्रकार मञ्च (एनएसजेएफ) ले आइतबार पत्रकार सम्मेलन आयोजना गर्दै मिति तय गरेको हो।

२३ र २४ भदौको जेन-जी आन्दोलनका कारण २९ भदौका लागि तय भएको कार्यक्रम अन्तिम समयमा स्थगित भएको थियो। यसैगरी स्पोर्ट्स अवार्डमा यति एयरलाइन्स नयाँ प्रायोजकका रूपमा जोडिएको मञ्चका अध्यक्ष निरञ्जन अधिकारीले बताए।

यति एयरलाइन्सले अवार्डमा सहभागी हुने मनोनयनमा पर्न सफल खेलाडी, प्रशिक्षक र अतिथिलाई सेवा प्रदान गर्नेछ। यसैगरी आइतबारदेखि नै अवार्डको महत्त्वपूर्ण विधाका रूपमा रहेको पिपल्स च्वाइस अवार्डको रोकिएको डिजिटल भोटिङ प्रक्रिया पनि खुला गरिएको छ।

मञ्चका महासचिव अञ्जन खड्काले भने, “विगतमा पिपल्स च्वाइसको मनोनयनमा रहेका खेलाडीले जति भोट प्राप्त गरेका थिए। त्यहीँबाट भोटिङ प्रक्रिया पुन: सुरु हुनेछ।” यस विधाको प्रतिस्पर्धामा उसुका विजय सिँजाली, क्रिकेटकी पूजा महतो, भलिबलका हिमाल सुनारी, फुटबलकी रेखा पौडेल र टेबलटेनिसकी इभाना थापा छन्।

स्पोर्ट्स समिट हुने
स्पोर्ट्स अवार्ड पोखरास्थित पोखरा सभागृहमा हुनेछ। त्यसको अघिल्लो दिन २२ पुसमा पोखरामा एनएसजेएफ स्पोर्ट्स समिट हुनेछ।

मञ्चका अध्यक्ष अधिकारीले अवार्डलाई चलायमान बनाउन स्पोर्ट्स समिट हुने र त्यसमा पोखराको पर्यटन र खेलकुद इकोनोमीबारे बहस हुने जनाए। अवार्डका अन्य विषय यथावत् रहेको र केही नयाँ कम्पनीसँग सहकार्य भएको छ।

गोल्छा ग्रुपसँगको मुख्य प्रायोजकको सम्झौताअनुरुप सहकार्य हुने नै छ। पोखरा महानगरपालिकाले अवार्डमा सहकार्य गर्नेछ। पोखरा महानगरका प्रमुख धनराज आचार्यसँग सहकार्यका लागि लिखित सम्झौता भइसकेको छ।

त्यसबाहेक सूर्य नेपाल प्रालि, डिटिजल भोटिङ पार्टनर आईएमई खल्ती डिजिटल वालेट, केल्मी नेपाल, इमेजिड, राष्ट्रिय खेलकुद परिषद्, नेपाल ओलम्पिक कमिटी, बाग्मती प्रदेश खेलकुद विकास परिषद्, नेपाल पर्यटन बोर्ड र आईएमई हस्पिटालिटी पनि पार्टनरका रूपमा छन्।

एनएसजेएफ पल्सर स्पोर्ट्स अवार्ड-२०८१ मा १० विधामा अवार्ड प्रदान गरिनेछ। त्यसमा वर्षको उत्कृष्ट खेलाडी पुरुष, वर्षका उत्कृष्ट खेलाडी महिला, वर्षका उत्कृष्ट खेलाडी युवा, वर्ष प्रशिक्षक, पिपल्स च्वाइस अवार्ड, पारा एथलिट सम्मान, स्पेसल अवार्ड, लाइफटाइम एचिभमेन्ट अवार्ड, एसियन स्पोर्ट्स जर्नालिस्ट अवार्ड र टिम अफ द इयर छ।

वर्ष खेलाडी पुरुष/महिला, पिपल्स च्वाइस, प्रशिक्षक र युवा गरी पाँच विधाका विजेतालाई बजाज पल्सर मोटरसाइकल प्रदान गरिनेछ। अन्य विधाका विजेतालाई जनही एक लाख रुपैयाँ प्रदान गरिनेछ। अवार्ड कार्यक्रमलाई सफल बनाउन मञ्चका अध्यक्ष अधिकारीको अध्यक्षतामा मूल आयोजक समिति गठन गरिएको छ।