वैदेशिक रोजगारीको प्रलोभनमा ठगी गर्ने ६ पक्राउ, अमेरिकादेखि टर्कीसम्मको सपना देखाएर असुली

वैदेशिक रोजगारीका लागि आकर्षक तलबको प्रलोभन देखाई विभिन्न देश पठाइदिन्छु भन्दै रकम ठगी गरेको अभियोगमा प्रहरीले ६ जनालाई पक्राउ गरेको छ।

काठमाडौं उपत्यका अपराध अनुसन्धान कार्यालय, टेकुबाट खटिएको विशेष टोलीले उनीहरूलाई उपत्यकाका विभिन्न स्थान र कास्कीबाट नियन्त्रणमा लिएको हो।

पक्राउ पर्नेहरूमा रामेछाप नगरपालिका–८ घर भएका ३३ वर्षीय रमेश कुमार विश्वकर्मा, गोरखा घर भई हाल काठमाडौं बस्ने ३५ वर्षीय चन्द्र बहादुर गुरूङ, ३० वर्षीय दिपेश गुरूङ र २४ वर्षीय सौगात गुरूङ रहेका छन्।

यस्तै, पाँचथर घर भई ललितपुर बस्ने ४८ वर्षीय सुर्य प्रकाश खेजुम र काभ्रे घर भई भक्तपुर बस्ने ३३ वर्षीया शान्ती श्रेष्ठलाई पनि प्रहरीले नियन्त्रणमा लिएको छ।

प्रहरीका अनुसार पक्राउ परेकामध्ये रमेशले अमेरिका पठाइदिने भन्दै एक पीडितबाट ३ लाख २५ हजार रूपैयाँ ठगी गरेका थिए। चन्द्र बहादुरले टर्की पठाइदिने प्रलोभनमा दुई जनाबाट २ लाख ९५ हजार रूपैयाँ असुलेका थिए भने दिपेश र सौगातले टर्कीकै लागि ८ जना पीडितहरूबाट कुल ८६ लाख २२ हजार ५ सय ७० रूपैयाँ ठगी गरेको खुलेको छ।

त्यसैगरी, सुर्य प्रकाशले साइप्रस पठाइदिने भन्दै ९ लाख ५० हजार र शान्तीले लिथुआनिया पठाउने भन्दै १ लाख ९३ हजार रूपैयाँ लिएर सम्पर्कविहीन भएको भन्दै पीडितहरूले उजुरी दिएका थिए। सोही उजुरीका आधारमा प्रहरीले खोजी कार्य तीव्र पारेको थियो।

प्रहरी टोलीले रमेशलाई कास्कीबाट, चन्द्र बहादुर र शान्तीलाई काठमाडौंका विभिन्न स्थानबाट बुधबार पक्राउ गरेको हो। दिपेश, सौगात र सुर्य प्रकाश भने मंगलबार नै पक्राउ परेका थिए।

पक्राउ परेका सबैलाई आवश्यक अनुसन्धान तथा थप कानुनी कारबाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ।

पछिल्लो समय वैदेशिक रोजगारीका नाममा ठगी गर्ने गिरोह सक्रिय रहेको भन्दै प्रहरीले सर्वसाधारणलाई सचेत रहन आग्रह समेत गरेको छ।