सुमामाथि खुकुरी प्रहार, गम्भीर अवस्थामा उपचार हुँदै

खुकुरी प्रहारबाट उदयपुरमा एक महिला गम्भीर घाइते भएकी छन् । बिहीबार मध्यान्ह त्रियुगा नगरपालिका २ संगमटोलकी २९ वर्षीया सुमा राई मामाको खुकुरी प्रहारबाट गम्भीर घाईते भएकी हुन् ।

स्थानीय रविन्द्र पौडेलको घरको आँगनमा मामा नाताका ४३ वर्षीय विनोद राईले धारिलो हतियार खुकुरी प्रहार गर्दा सुमाघाइते भएको जिल्ला प्रहरी कार्यालय उदयपुरले जनाएको छ । प्रहरीका अनुसार करिब ११:५० बजेतिर भएको सामान्य बिबादले चर्को रुप लिएपछि खुकुरी प्रहारसम्म पुगेको घट्नाबारे स्थानीयले प्रहरीलाई जानकारी गराएका थिए ।

स्थानीयको खबरलगत्तै जिल्ला प्रहरी कार्यालय उदयपुरका प्रहरी निरीक्षक विष्णुबहादुर खड्का कमाण्डको १० जनाको प्रहरी टोली घटनास्थल पुगेको थियो । टोली पुग्दा सुमाको अवस्था गम्भी भईसकेकाले तत्काल उपचारार्थ जिल्ला अस्पताल गाईघाट ल्याइएको प्रहरीले जनाएको छ ।

खुकुरीले टाउको र शरीरका विभिन्न भागमा गहिरो चोट लागेकी सुमाको अस्पतालमा प्राथमिक उपचारपछि थप उपचारका लागि विराटनगर रिफर गरिएको छ । गाईघाटमा उपचार संभव नभएकाले थप उपचारका लागि विराटनगरस्थित न्युरो अस्पताल रिफर गरिएको अस्पताल प्रमुख डा. मुकेश झाले बताए ।

खुकुरी प्रहारकर्ता बिनोदलाई घट्नास्थलबाटै नियन्त्रणमा लिएर जिल्ला प्रहरी कार्यालय उदयपुरको हिरासतमा राखेर थप अनुसन्धान सुरु भएको प्रहरी प्रवक्ता डीएसपी चिरञ्जीवी थापाले बताएका छन् ।