सामसुङका सहायक सीईओ हानको हृदयघातबाट निधन

दक्षिण कोरियाली टेक कम्पनी सामसुङ इलेक्ट्रोनिक्सका सहायक सीईओ हान जोङ–हीको निधन भएको छ। ६३ वर्षको उमेरमा मंगलबार हृदयघातबाट उनको निधन भएको हो।

सन् १९६२ मा जन्मिएका हानले २०२२ देखि उपभोक्ता इलेक्ट्रोनिक्स र मोबाइल उपकरण विभाग सम्हाल्दै आएका थिए। उनलाई २०२२ मा उपाध्यक्ष र सहायक सीईओ बनाइएको थियो।

सामसुङका अनुसार हानले ३७ वर्षभन्दा बढी समय कम्पनीको टिभी व्यवसायलाई विश्वमा अग्रणी बनाउन काम गरे। कम्पनीले भनेको छ, ‘यो कठिन समयमा हाम्रो समवेदना उनको परिवार र नजिकका मानिसहरूसँग छ।’ हानको उत्तराधिकारीबारे अहिलेसम्म कुनै जानकारी दिइएको छैन।

हानले इन्हा विश्वविद्यालयबाट इलेक्ट्रिकल इन्जिनियरिङमा स्नातक गरेर १९८८ मा सामसुङमा काम शुरू गरेका थिए। इलेक्ट्रोनिक्स र उपकरण विभाग सम्हाल्नुअघि उनी डिस्प्ले सञ्चालनको जिम्मेवारीमा थिए। सामसुङको एलईडी टिभी ल्याउन उनको मुख्य भूमिका थियो।