लापु-लापु दिवसमा भीडमाथि कार ठोक्किँदा क्यानडामा ११ को मृत्यु

क्यानडाको भ्यानकुभरमा आइतबार लापु–लापु दिवस मनाउने क्रममा कार भीडमा ठोक्किँदा ११ जनाको मृत्यु भएको छ। यो दुर्घटनामा दर्जनौं घाइते भएका छन्।

संदिग्ध चालक, ३० वर्षीय काई–जी एडम लो पक्राउ परेका छन्। भ्यानकुभरका बासिन्दा उनलाई हिरासतमा लिइएको छ। उनीमाथि हत्याको आरोप लगाइएको छ। थप आरोप पनि लगाइनेछ। प्रहरीले मृतकहरूको उमेर ५ देखि ६५ वर्षसम्म रहेको र केहीको पहिचान बाँकी रहेको बताएको छ।

शनिबार साँझ ८:१४ बजे सनसेट क्षेत्रमा लापु–लापु उत्सवमा कालो अडी एसयूभी भीडमा ठोक्किएको थियो। प्रहरीले ३२ जना घाइते भएको, १७ जना अस्पतालमा रहेको र केहीको अवस्था गम्भीर रहेको भनेकाे छ।

‘१०० भन्दा बढी प्रहरी अनुसन्धानमा खटिएका छन्,’ एक प्रहरी अधिकारीले भने, ‘प्रमाणको आधारमा यो आतंकवादी घटना होइन।’ संदिग्धको मानसिक स्वास्थ्यसँग सम्बन्धित विगतमा प्रहरी सम्पर्क रहेको उनले बताए।

फिलिपिन्समा हरेक अप्रिल २७ मा लापु–लापु दिवस मनाइन्छ, जसले स्पेनी उपनिवेशवादीविरुद्ध लड्ने नेता लापु–लापुको सम्मान गर्छ। भ्यानकुभरमा यो उत्सव २०२३ देखि मनाइन्छ।

क्यानडाका प्रधानमन्त्री मार्क कार्नी र फिलिपिन्सका राष्ट्रपति फर्डिनान्ड मार्कोस जुनियरले शोक व्यक्त गरेका छन्। आइतबार साँझ स्मृति सभा भयो। मेयर केन सिमले यो घटनालाई शहरको दुखद दिन भने।