युक्रेन युद्धमा उत्तर कोरियाली सैनिक सहभागि, दुवै देशद्वारा पुष्टि

उत्तर कोरियाले पहिलो पटक रुस-युक्रेन युद्धमा रुसको पक्षबाट लड्न सेना पठाएको पुष्टि गरेको छ। कोरियन सेन्ट्रल न्यूज एजेन्सी (केसीएनए) को रिपोर्टमा यो जानकारी दिइएको हो।

केसीएनएका अनुसार नेता किम जोङ उनको आदेशमा उत्तर कोरियाली सैनिकले कुर्स्क सीमा क्षेत्र ‘पूर्ण रूपमा मुक्त’ गर्न रुसी सेनालाई सहयोग गरेको छ। दक्षिण कोरिया र पश्चिमी गुप्तचर निकायले गत वर्षदेखि कुर्स्कमा हजारौं उत्तर कोरियाली सेना पठाइएको दाबी गर्दै आएका थिए।

केसीएनएले यो तैनाथी उत्तर कोरिया-रुस पारस्परिक रक्षा सन्धिअनुसार भएको बताएको छ। रुसी चिफ अफ स्टाफ भ्यालेरी गेरासिमोभले उत्तर कोरियाली सैनिकको ‘बहादुरी’ को प्रशंसा गरेका छन्।

गेरासिमोभले रुसले कुर्स्क क्षेत्रमा पूर्ण नियन्त्रण कायम गरेको दाबी गरे, तर युक्रेनले यो दाबी अस्वीकार गरेको छ। दक्षिण कोरियाली समाचार एजेन्सी योन्हापका अनुसार, गेरासिमोभले पुटिनसँगको भिडियो कन्फरेन्समा उत्तर कोरियाली सेनाले कुर्स्क मुक्तिमा महत्त्वपूर्ण भूमिका खेलेको बताए।

‘म कुर्स्क क्षेत्रको मुक्तिमा उत्तर कोरियाली सैनिकको सहभागिताबारे भन्न चाहन्छु, उनीहरूले हाम्रो सन्धिअनुसार युक्रेनी आक्रमणकारीलाई परास्त गर्न ठूलो सहयोग गरे,’ गेरासिमोभले क्रेमलिनको वेबसाइटमा पोस्ट गरिएको भिडियोमा भने।

पुटिनले कुर्स्कमा युक्रेनको गत वर्षको आक्रमणपछि नियन्त्रण फिर्ता लिएको दाबी गरे। उनले कुर्स्कको मुक्तिले युक्रेनको ‘नव-नाजी शासन’ को पराजय नजिक ल्याएको बताए।

रुस र उत्तर कोरियाको यो स्वीकारोक्ति अमेरिका, दक्षिण कोरिया, बेलायत र युक्रेनले उत्तर कोरियाली सेना युद्धमा देखिएको एक वर्षपछि आएको छ। युक्रेनको जनरल स्टाफले टेलिग्राममा कुर्स्कमा शत्रुता समाप्त भएको पुटिनको दाबी ‘गलत’ भएको बताए।

‘कुर्स्कमा युक्रेनी रक्षा अभियान जारी छ। अवस्था जटिल छ, तर हाम्रा एकाइहरूले आफ्नो कार्य सम्पादन गरिरहेका छन्,’ टेलिग्राम पोस्टमा भनिएको छ। एजेन्सी