तत्काल विद्यालय सञ्चालन गर्न फुङलिङ नगरपालिकाको निर्देशन

ताप्लेजुङको फुङलिङ नगरपालिकाले विद्यालय बन्द हुँदा समग्र शैक्षिक कार्यतालिका प्रभावित भएको भन्दै यथाशीघ्र कक्षा सञ्चालन गर्न नगरक्षेत्रका विद्यालयलाई आवह्वान गरेको छ ।

नगर शिक्षा समितिका अध्यक्ष एवम् नगरप्रमुख अमिर मादेनले सोमबार एक विज्ञप्ति प्रकाशित गरी शिक्षकहरुको जायज माग पूरा गर्न नेपाल सरकारसँग आग्रह समेत गरेका छन् । उनले करिब महिना दिनदेखि सामुदायिक विद्यालयका शिक्षक तथा कर्मचारीहरु सडक आन्दोलनमा जाँदा भर्ना अभियानसमेत हुन नसकेको, समग्र शिक्षा प्रणालीमानै नकारात्मक प्रभाव परेकोले यथाशीघ्र सामुदायिक विद्यालय सञ्चालन गर्न भनेका छन् ।

नगरपालिकाले नगर शिक्षा समिति र वडा शिक्षा समिति समेतकोतर्फबाट यस्तो अपिल गरिएको बताएको छ । नगरपालिकाले समग्र शैक्षिक क्रियाकलाप नै ठप्प हुँदा लाखौं विद्यार्थीहरुमा मनोवैज्ञानिक रुपमा दूरगामी असर परिरहेकोले नगरक्षेत्रका बिद्यालयहरु सुचारु गर्न आग्रह गरेको छ ।