विष सेवनबाट छोराको मृत्यु, आमाको अवस्था गम्भीर

सप्तरीको राजविराज नगरपालिका–१ चनौरामा एक जना आमाले छोरालाई विष खुवाएर आफूले समेत विष सेवन गरेकी छन् । विष सेवनपछि चार वर्षीय छोराको उपचारको क्रममा मृत्यु भएको छ । गम्भीर अवस्थामा रहेकी आमाको उपचार भइरहेको छ ।

घरायसी विवादमा २५ वर्षीया काजलदेवी साफीले आइतबार साँझ आफ्नो चार वर्षीय छोरालाई विष खुवाएर आफूले पनि खाएको प्रहरीको प्रारम्भिक अनुसन्धानबाट खुलेको छ ।

विष खुवाउँदा सिकिस्त भएका बालकलाई उपचारका लागि गजेन्द्रनारायण सिंह अस्पताल राजविराज ल्याइएको थियो । थप उपचारका लागि बीपी कोइराला स्वास्थ्य विज्ञान प्रतिष्ठान धरान पठाउँदा त्यहाँ पनि उपचार सम्भव हुन सकेन । त्यहाँबाट उनलाई नोबेल अस्पताल विराटनगर रिफर गरिएको थियो ।

उनको उपचारका क्रममा सोमबार बिहान मृत्यु भएको प्रहरी उपरीक्षक ढकेन्द्र खतिवडाले जानकारी दिए ।

विष सेवन गरेकी काजलको नोबेल अस्पतालमै उपचार भइरहेको छ । उनको पनि अवस्था गम्भीर रहेको खतिवडाले बताए । घटनाबारे थप अनुसन्धान भइरहेको प्रहरीले जनाएको छ ।