नागरिक उन्मुक्ति र जनमत पार्टीबीच एकता घोषणा भोलि, रञ्जिता सह–अध्यक्ष बन्न तयार

नागरिक उन्मुक्ति पार्टीका अध्यक्ष रञ्जिता श्रेष्ठले जनमत पार्टीसँग भोलि (वैशाख १७) एकता घोषणा हुने बताएकी छन्।

मंगलबार सामाजिक सञ्जालमार्फत उनले जनमत पार्टीका अध्यक्ष डा. चन्द्रकान्त (सीके) राउतसँगको सहकार्यमा मधेश र सुदूरपश्चिमका पीडित जनताको आवाज बुलन्द गर्ने संकल्प व्यक्त गर्दै आफूले सह–अध्यक्षको भूमिका स्वीकार्ने घोषणा गरिन्।

श्रेष्ठले यस एकतालाई दुई दलको मिलन मात्र नभई साझा पीडा र आशाको ऐतिहासिक क्षण भएको बताइन्। “हामीले अन्याय र चोट खेपेका छौं, तर अब हाम्रो आवाज फुट्ने छैन। यो एकता सुदूरपश्चिमको पहाडदेखि मधेशको तराईसम्म जनताको आँखामा उज्यालो ल्याउने प्रयास हो,” उनले भनिन्।

उनले डा. राउतको बौद्धिक र दूरदर्शी नेतृत्वमा जनताको पक्षमा निष्कलंक काम गर्ने विश्वास व्यक्त गरिन्। पदभन्दा जनताको भरोसा र बलिदान ठूलो भएको भन्दै सह–अध्यक्ष बन्ने निर्णयले केहीलाई भावनात्मक असर पर्न सक्ने बताउँदै उनले सबैलाई एकताको बाटोमा अघि बढ्न आग्रह गरिन्।

एकतापछि पार्टीको नीति, विधि र अनुशासनमा बाँधिएर व्यक्तिगत स्वार्थभन्दा माथि उठी जनहितमा काम गर्नुपर्ने उनको जोड छ। श्रेष्ठले यो एकताले देशभर सन्देश फैलाउने र जनता, न्याय र समताका लागि साझा संघर्ष गर्ने बताइन्। “हामी फुट्ने र झुक्ने छैनौं, किनभने हामी अब एउटा सपनाका लागि एक भएका छौं,” उनले भनेकी छन्।