'मानवीय श्रम बिना कुनै वस्तुको मूल्य हुँदैन'

नेकपा (एकीकृत समाजवादी) की नेता तथा पूर्वमन्त्री रामकुमारी झाँक्रीले मानवीय श्रम बिना कुनै वस्तुको मूल्य नहुने बताएकी छन्।

मे दिवसको सन्दर्भलाई सम्झिँदै झाँक्रीले फेसबूकमा लेखेकी छन्, 'मानवीय श्रम बिना कुनै पनि बस्तुको मूल्य हुँदैन। श्रम र श्रमिक बिना कुनै पनि वस्तु र सेवा उपलब्ध हुँदैन। यिनै महान् श्रमिकप्रति समर्पित छ आजको दिन 'मे फस्ट। श्रम र श्रमिकप्रति हार्दिक सम्मान।'

उनी अगाडि लेख्छिन्, 'नेपालमा हामीले भोगेको ऐतिहासिक रूपमा रहेको समस्या पुँजीको निर्माण, उत्पादन र रोजगारीको हो। जसले गर्दा श्रम बजार औपचारिक रूपमा विकास भएकै छैन। हरेक राजनिती परिवर्तनपछि हामी वितरण कुरा गर्‍यौँ तर, पूँजीको विकास र उत्पादनको नीति राम्रो भएन। पुँजी र उत्पादन बिना के बाँड्ने ? यही समस्याबाट हामी गुज्रिरह्यौँ।'

आज अन्तर्राष्ट्रिय श्रमिक दिवस हो। नेपालसहित विश्वभर विभिन्न कार्यक्रम गरी मनाइँदैछ।