पार्टी एकता गर्न राजेन्द्र राईलाई मुख्यमन्त्री कार्कीको प्रस्ताव

कोशी प्रदेशका मुख्यमन्त्री तथा नेकपा (एमाले) का स्थायी कमिटी सदस्य हिक्मत कार्कीले नेकपा (एकीकृत समाजवादी) का नेताहरूलाई पार्टी एकताको प्रस्ताव गरेका छन्।

आइतबार (आज) पार्टीका तर्फबाट ज्ञापनपत्र बुझाउन मुख्यमन्त्री तथा मन्त्रिपरिषद्को कार्यालय आएका पूर्वमुख्यमन्त्रीसमेत रहेका एकीकृत समाजवादीका उपमहासचिव राजेन्द्र राईसहितका नेताहरूलाई कार्कीले पार्टी एकताको प्रस्ताव गरेका हुन्।

ज्ञापनपत्र बुझेपछि कार्कीले अनौपचारिक रूपमा भने, 'यतिका नेता भएको ठाउँमा म एउटा कुरा भन्छु, दुई गौरवशाली पार्टी भनेर मात्रै भएन। अब एउटै गौरवशाली पार्टी बनाउनुपर्छ।’

एकीकृत समाजवादी एमाले विभाजन भएपछि बनेको पार्टी हो। तत्कालीन एमाले वरिष्ठ नेता माधवकुमार नेपालले पार्टी विभाजन गरेर एकीकृत समाजवादी गठन गर्दा राजेन्द्र राईलगायतका नेताहरू त्यही कित्तामा उभिएका थिए। उनी पछि त्यही पार्टीबाट प्रदेशको मुख्यमन्त्रीसमेत बने।

अहिले उनी पार्टीको उपमहासचिव पदमा छन्। अहिले उनी प्रदेश सभाको संसदीय दलको नेतासमेत हुन्।