एघार दिनमै दोस्रोपटक बढ्यो अण्डाको मूल्य

अण्डाको मूल्यमा पुनः वृद्धि भएको छ। नेपाल लेयर्स कुखुरापालक सङ्घले फार्म समर्थन मूल्य बढाउने निर्णय गरेसँगै उपभोक्ताले अण्डाका लागि थप रकम तिर्नुपर्ने भएको हो।

सङ्घले चितवनलाई आधार मानेर निर्धारण गरेको नयाँ मूल्यसूचीअनुसार जेठ २३ गतेदेखि लागू हुने गरी विभिन्न श्रेणीका अण्डाको मूल्य प्रतिक्रेट १५ रुपैयाँले बढाइएको छ। यसअघि पनि जेठ १२ गते मूल्य समायोजन गरिएको थियो। यसरी ११ दिनको अन्तरालमै अण्डाको मूल्य दोस्रोपटक बढेको हो।

नयाँ मूल्यअनुसार एक्सएल अण्डा प्रतिक्रेट ५६० रुपैयाँ पुगेको छ। यसअघि यसको मूल्य ५४५ रुपैयाँ थियो। त्यस्तै ठूलो अण्डाको मूल्य ५३० रुपैयाँबाट बढेर ५४५ रुपैयाँ पुगेको छ भने मिडियम अण्डा ५०० रुपैयाँबाट बढेर ५१५ रुपैयाँ कायम गरिएको छ।

सानो आकारको अण्डाका लागि भने फरक मापदण्ड अपनाइएको छ। सङ्घले सानो अण्डाको मूल्य प्रतिक्रेट नभई प्रतिपेटी ३ हजार रुपैयाँ तोकेको छ। यसअघि सानो अण्डा प्रतिक्रेट ४०० रुपैयाँमा कारोबार हुँदै आएको थियो।

पछिल्ला दिनमा अण्डाको मूल्य लगातार उकालो लाग्न थालेपछि यसको प्रभाव खुद्रा बजारमा पनि पर्ने अनुमान गरिएको छ। फार्म मूल्य बढेसँगै उपभोक्ता तहमा अण्डाको खुद्रा मूल्य अझ महँगो हुन सक्ने व्यवसायीहरू बताउँछन्।

अण्डाको मूल्यमा भएको पछिल्लो वृद्धिले दैनिक उपभोग्य वस्तुको खर्च बढ्दै गएको अवस्थामा उपभोक्तामाथि थप आर्थिक भार पर्ने देखिएको छ।