काठमाडौं महानगरले बाइक एम्बुलेन्स चलाउने

काठमाडौं महानगरपालिकाले ट्राफिकमा पनि असर नगर्नेगरी आपतकालीन स्वास्थ्य सेवाका लागि बाइक एम्बुलेन्स सञ्चालन गर्ने भएको छ । यो सेवाले सवारी जामका कारण प्रभावित हुने आपतकालीन स्वास्थ्य सेवामा सहजता ल्याउने विश्वास महानगरले लिएको छ ।

जामको कारण हुने ढिलाइ कम गर्न मोटरसाइकल एम्बुलेन्स सेवा सञ्चालनमा ल्याउने तयारी गरेको महानगरले जनाएको छ ।

महानगरका स्वास्थ्य शाखाका इन्चार्ज दीपक केसीको अनुसार एम्बुलेन्स सेवालाई थप छिटो, सहज र व्यावहारिक बनाउने उद्देश्यसहित महानगरले दुई पांग्रे एम्बुलेन्सको अवधारणा अघि सारेको हो । मोटरसाइकल एम्वुलेन्स खरदि प्रक्रियामा रहेको र छिट्टै सञ्चालनमा ल्याउने केसीले बताए ।

महानगरकी कार्यबाहक प्रमुख सुनिता डंगोलले आपतकालीन अवस्थामा छिटो सेवा प्रदान गर्नको लागि विभागलाई यस्तो सेवा संचालन ल्याउन निर्देशन दिइसकेकी छन् ।

सेवा दिन बिरामीलाई अस्पताल लैजानुअघि मोटरसाइकल एम्बुलेन्सबाट चिकित्सक घटनास्थलमै पुग्नेछन्। यो सेवा लिनको लागि १०२ मा फोन गर्नुपर्नेछ । साथै एम्बुलेन्स कहाँ पुग्दैछ, त्यसमा को–को छन् भन्ने जानकारी बिरामीका आफन्तले थाहा पाउने प्रणालीको समेत विकास गर्ने तयारी भइरहेको छ। ४९ वटा एम्वुलेन्स खरिद गर्ने तयारी भएको महानगरले जनाएको छ।