उपन्यासकार ध्रुवकृष्ण ताम्राकारको ‘दह’ लोकार्पण

अक्षरमार्गले साहित्यकार ध्रुवकृष्ण ताम्राकारको ‘दह’ उपन्यास लोकार्पण गरेकाे छ।

सो उपन्यासको लोकार्पण उपन्यासकार तथा कार्यक्रमका प्रमुख अतिथि प्राडा विष्णु एस राई, साहित्यकार सूर्य लाकोजू , समालोचक डा हरिप्रसाद सिलवाल, समालोचक ध्रुव मधिकर्मी र उपन्यासकार ध्रुव ताम्राकारले संयुक्त रूपमा विमोचन गरेका हुन्।

कार्यक्रममा बोल्दै प्रमुख अतिथि विष्णु राईले दह एक पठनीय कृति भएको बताए। एक प्रसंगमा उनले पुस्तक समाजका लागि लेखिने भएकाले कथाले समाजमा घट्ने घटनालाई सजीव ढंगले प्रस्तुत गर्नुपर्ने विचार व्यक्त गरे।

त्यस्तै साहित्यकार सूर्य लाकोजूले उपन्यास पठनीय रहेको बताए। उनले उपन्यास समाजमा भएका वास्तविक घटनाहरूमा आधारित रहेकाले पढ्दै जाँदा तपाईहामीले देखेभोगेका कुरा रहेको आभास मिल्ने बताए।

त्यस्तै प्रमुख वक्ता समालोचक हरिप्रसाद सिलवालले कृति सरल भएर पनि सरस र गहन भएको विचार व्यक्त गरे।

अर्का वक्ता ध्रुव मधिकर्मीले उपन्यास गहन र पठनीय रहेको विचार पोखे।

उपन्यासकार ताम्राकारका ‘प्रारम्भ’ र ‘हृदयका उद्गार’ दुइ कवितासंग्रह, भावनाका उत्सर्ग गीतसंग्रह, स्पन्दन मुक्तकसंग्रह र आँसुको कथा एवं मिराज कथा संग्रह प्रकाशित छन्।अक्षरमार्गद्वारा आयोजित सो कार्यक्रमको सञ्चालन शम्भुलाल श्रेष्ठले गरेका थिए।