खोटाङमा नयाँ भाडादर निर्धारण: बसलाई प्रतिकिमी १३ र जीपलाई १५ रुपैयाँ

दसैं-तिहारका बेला आफूखुसी भाडा असुल्ने प्रवृत्ति नियन्त्रण गर्न खोटाङमा चल्ने सार्वजनिक यातायातका साधनमा नयाँ भाडादर कायम गरिएको छ।

जिल्ला प्रशासन कार्यालय खोटाङमा बसेको सर्वपक्षीय बैठकले कोसी प्रदेश सरकारको परिपत्रअनुसार यात्रुवाहक बस, मिनी बस र हायसका लागि प्रतिकिलोमिटर १३ रुपैयाँ तथा जीप र सुमोका लागि प्रतिकिलोमिटर १५ रुपैयाँ भाडादर तोकेको हो।

नयाँ दरअनुसार सदरमुकाम दिक्तेलदेखि जयरामघाटसम्म बस र हायसका लागि ३७४ रुपैयाँ तथा सुमो र जीपका लागि ५११ रुपैयाँ कायम गरिएको छ।

यस्तै, दिक्तेलदेखि त्रिधार्मिकस्थल हलेसी बजारसम्म बस र हायसमा २१२ रुपैयाँ तथा जीप र सुमोमा २९० रुपैयाँ भाडा निर्धारण गरिएको छ। दिक्तेलको रत्नपार्क (किरात चोक) देखि कारागारसम्म बसमा १७ र जीपमा २३ रुपैयाँ लाग्नेछ।

नयाँ भाडादर अनुसार हलेसीदेखि अर्खौलेसम्म बसमा ६७ र जीपमा ९२ रुपैयाँ, बिजुलेसम्म क्रमशः ८४ र ११५ रुपैयाँ तथा नुनथलासम्म १०९ र १७५ रुपैयाँ तोकिएको छ।

यस्तै, दिक्तेल रत्नपार्कदेखि सोल्मासम्म बसमा २३ र जीपमा ३० रुपैयाँ तथा नेर्पासम्म ५६ र ७६ रुपैयाँ निर्धारण गरिएको छ। दिक्तेलदेखि थापागाउँसम्म क्रमशः ८४ र ११५ तथा बानाचुङसम्म ११२ र १५३ रुपैयाँ भाडा कायम भएको छ।

जथाभावी भाडा असुल्ने गुनासो बढेपछि यात्रुलाई ठगिनबाट जोगाउन दररेटमा एकरूपता ल्याइएको प्रमुख जिल्ला अधिकारी गणेशकुमार गुरुङले बताए।

निर्णय उल्लङ्घन गरी तोकिएभन्दा बढी भाडा लिएको पाइएमा प्रचलित कानुनबमोजिम कारबाही गरिने उनले जनाए।

बैठकले दिक्तेलदेखि बाक्सिला (४२ किमी), साकेलाको मानेभञ्ज्याङ (२७ किमी), दिप्रुङचुईचुम्माको याङ्सोलाटार (३० किमी), रावाबेँसीको हरमटार (२२ किमी), ऐसेलुखर्क (४६ किमी), खोटेहाङको खोटाङ बजार (७० किमी), जन्तेढुङ्गाको चिसापानी (९० किमी) र बाराहापोखरीको बागखोर (१०० किमी) लगायतका ग्रामीण सडकखण्डलाई अस्थायी रुट कायम गर्न प्रदेश सरकारसमक्ष सिफारिस गरेको छ।

अटो तथा तीनपाङ्ग्रे सवारी साधनको भाडा निर्धारण र व्यवस्थापनको अधिकार भने सम्बन्धित स्थानीय तहलाई दिइएको छ।

यसैबीच, चाडपर्वमा दुर्घटना न्यूनीकरणका लागि ट्राफिक प्रहरीले यान्त्रिक परीक्षण, मापसे जाँच, ओभरलोड नियन्त्रण र गति सीमित गर्न राजमार्ग तथा ग्रामीण सडकमा निगरानी बढाउने निर्णय गरेको छ।