परीक्षामा पास गराइदिने भन्दै नाबालिकामाथि यौन दुर्व्यवहार गर्ने शिक्षक पक्राउ

परीक्षामा पास गराइदिने प्रलोभन देखाएर १३ वर्षीया नाबालिका छात्रामाथि पटक-पटक यौन दुर्व्यवहार गरेको आरोपमा रामेछापमा एक शिक्षक पक्राउ परेका छन्।

पक्राउ पर्नेमा झापा गौरादह नगरपालिका-४ स्थायी घर भई हाल रामेछापको सुनापति गाउँपालिका-५ मा बस्दै आएका ४८ वर्षीय नवीन भन्ने नवराज भण्डारी रहेका छन्।

प्रहरीका अनुसार विद्यालयमा अध्यापन गराउँदै आएका भण्डारीले नाबालिका छात्रालाई परीक्षामा पास गराइदिने भन्दै ललाईफकाई संवेदनशील अंगमा छुने र चिमोट्ने गरेको आरोप छ।

त्यसैगरी उनले फेसबुक मेसेन्जरमार्फत नाबालिकालाई अश्लील फोटो, भिडियो तथा म्यासेज पठाउने र यौनजन्य क्रियाकलाप गरी पटक-पटक बाल यौन दुरुपयोग गरेको प्रहरीको भनाइ छ।

प्रहरीले आरोपित शिक्षक भण्डारीलाई बुधबार पक्राउ गरेको हो। उनलाई रामेछाप जिल्ला अदालतबाट ६ दिनको म्याद थप गरी घटनाबारे अनुसन्धान भइरहेको जिल्ला प्रहरी कार्यालय रामेछापले जनाएको छ।