सिङ्गो पार्टीले जितेको छ, कसैले हारेको छैन: रवि लामिछाने

राष्ट्रिय स्वतन्त्र पार्टी (रास्वपा) का सभापति रवि लामिछानेले महाधिवेशनको आन्तरिक निर्वाचन परिणामलाई जित र हारको साँघुरो घेराबाट नलिन आग्रह गरेका छन्।

पदाधिकारी र केन्द्रीय सदस्यहरूको निर्वाचन परिणाम सार्वजनिक भएपछि प्रतिनिधिहरूलाई सम्बोधन गर्दै उनले यस लोकतान्त्रिक प्रक्रियामा सिङ्गो पार्टी विजयी भएको बताए।

सभापति लामिछानेले आन्तरिक प्रतिस्पर्धाले पार्टीलाई थप एकताबद्ध र बलियो बनाएको जिकिर गरे।

‘यो निर्वाचनमा कसैको हार भएको छैन, सिङ्गो रास्वपाले जितेको छ,’ लामिछानेले भने, ‘प्रजातान्त्रिक अभ्यासमा अंकगणित तलमाथि हुनु स्वाभाविक हो, तर यसले हाम्रा नेताहरूको योग्यता र प्रतिबद्धतालाई कम गर्दैन।’

उनले नवनिर्वाचित कार्यसमितिलाई बधाई दिँदै निर्वाचनमा प्रतिस्पर्धा गरेका सबै नेताहरूको क्षमता र अनुभवलाई पार्टी निर्माणमा उचित स्थान दिइने प्रतिबद्धता जनाए।

‘अब हामी एउटै घण्टीमुनि गोलबद्ध भएर देश निर्माणको महाअभियानमा होमिनुपर्छ,’ उनले थपे, ‘जनताले हामीबाट ठूलो आशा राखेका छन्, त्यसैले रिस–राग र मनमुटाव त्यागेर सबै एक ढिक्का भई अगाडि बढ्नुको विकल्प छैन।’