अलमलमा परेकाहरुले कार्य क्षेत्रमा खटिएका प्रहरीसँग सहयोग लिन सक्ने : शहरी मन्त्रालय

जोखिमयुक्त क्षेत्रमा बसोबास गरिरहेका नागरिकलाई सुरक्षित स्थानमा स्थानान्तरण तथा व्यवस्थापन गर्ने कार्य सहज रूपमा अघि बढिरहेको सरकारले दाबी गरेको छ।

साहारा नभएका तथा वास्तविक समस्यामा रहेका नागरिकका लागि सरकारले अर्को व्यवस्था नभएसम्म होटल तथा लजमा बस्ने, खाने लगायतका आधारभूत सुविधाहरूको प्रवन्ध मिलाएको शहरी विकास मन्त्रालयले जनाएको छ।

सहारा चाहिएका तर, अलमलमा परेका नागरिकले कार्य क्षेत्रमा खटिएका प्रहरीसँग सम्पर्क गरी आवश्यक सहयोग लिन सक्ने पनि मन्त्रालयले स्पष्ट पारेको छ। मन्त्रालयका अनुसार कसैको सामान ढुवानीसहित त्रिपुरेश्वरस्थित दशरथ रंगशालामा सहज रूपमा पुर्‍याउने व्यवस्था प्रहरीद्वारा मिलाइएको छ।

सबै सामानको सुरक्षित व्यवस्थापन गरिने र रंगशालामा अभिलेख राखेपछि सम्बन्धित लज तथा होटलमा यातायातसहित बसोबासको व्यवस्था मिलाइएको मन्त्रालयले जनाएको छ।