विराटनगरबाट किन पक्राउ परे दुई भारतीय ?

विराटनगरबाट गाँजासहित दुई जना भारतीय नागरिकलाई प्रहरीले पक्राउ गरेको छ। प्रहरीले २४ किलो ४ सय ग्राम गाँजासहित दुई जना भारतीय नागरिकलाई पक्राउ गरेको मोरङ प्रहरीले जनाएको छ।

भारत बिहारको अररिया जिल्ला फुलकाहा-१ का २० वर्षीय प्रवेशकुमार साह र २० वर्षीय सुरेशकुमार साहलाई गाँजासहित पक्राउ गरेको मोरङ प्रहरीका प्रवक्ता डिएसपी मकेन्द्रकुमार मिश्रले जानकारी दिए। उनका अनुसार विराटनगर-१८ रेल्वे क्षेत्रबाट बुधबार बिहान करिब साढे ११ बजेतिर उनीहरूलाई पक्राउ गरिएको हो।

भारततर्फ जाँदै गरेको बीआर ३८ एई ०४९७ नम्बरको मोटरसाइकललाई शंका लागेर अस्थायी प्रहरी पोस्ट भेडियारीको टोलीले रोकेको थियो। चेक गर्दा दुई वटा ठुला कालो प्लास्टिकका पोकाभित्र गाँजा फेला परेको डिएसपी मिश्रले बताए।

गाँजा र मोटरसाइकलसहित दुवै जनालाई नियन्त्रणमा लिएर इलाका प्रहरी कार्यालय रानीमा राखेर थप अनुसन्धान अघि बढाइएको प्रहरीले जनाएको छ।