घर फोडी चोरी गरेको आरोपमा युवक पक्राउ, नगद र गरगहना बरामद

मकवानपुर प्रहरीले हेटौंडा उपमहानगरपालिका–७ क्याम्पडाँडास्थित एक घरमा चोरी गरेको आरोपमा एक जनालाई पक्राउ गरेको छ।

प्रहरीका अनुसार असार १० गते दिउँसो सनगुड कोलोनी निवासी कृष्णप्रसाद गौतमको घरमा कोही नभएको बेला घरको पूर्वतर्फको ढोका फुटाएर चोरी भएको थियो। चोरीमा करिब एक तोला सुन, २५.५ तोला चाँदी (१५ वटा सिक्का) तथा नगद चार लाख रुपैयाँ चोरी भएको प्रारम्भिक अनुसन्धानबाट खुलेको छ।

घटनापछि अनुसन्धानका क्रममा प्रहरीले रामेछाप हिमागंगा गाउँपालिका–४ स्थायी घर भई हाल हेटौंडा उपमहानगरपालिका–१५ फारलाइन बस्दै आएका २५ वर्षीय मनोज पुलामी मगरलाई पक्राउ गरेको हो।

प्रहरीले उनको कोठामा खानतलासी गर्दा चाँदीका सिक्का, नगद, विभिन्न गरगहना, सुनजस्तो देखिने पहेँलो धातुका गहनालगायत विभिन्न सामग्री बरामद गरेको जनाएको छ।

सोधपुछका क्रममा पक्राउ परेका पुलामी जेनजी आन्दोलनका क्रममा भीमफेदी कारागारबाट फरार भएका व्यक्ति रहेको समेत खुलेको प्रहरीले जनाएको छ।

बरामद सामानसहित उनलाई जिल्ला प्रहरी कार्यालय मकवानपुर ल्याई आवश्यक कानुनी प्रक्रिया अघि बढाइएको छ। घटनाबारे थप अनुसन्धान भइरहेको प्रहरीले जनाएको छ।