बिहिबार नेप्से परिसूचक १०.०७ अंकले घट्यो

काठमाडौँ, वैशाख ३१ । सेयरबजार परिसूचक नेप्सेमा विहीबार पनि गिरावट आएको छ । आज नेप्से १०.०७ अंकले घटेर २ हजार ७३०.१७ विन्दुमा कायम भएको हो ।

आज सेयरबजारमा कुल ३३७ कम्पनीका सेयर कारोबार भएका छन् । यी मध्ये ८० कम्पनीका सेयरमूल्य बढेका छन् भने १७४ कम्पनीका सेयरमूल्यमा गिरावट आएको छ ।

आज कुल ७९ लाख ५८ हजार ७५२ कित्ता सेयर ३ अर्ब २९ करोड २ लाख ४५ हजार रुपैयाँमा किनबेच भएको छ । कारोबार रकम बुधबारको तुलनामा १७ प्रतिशतले बढी हो । आज सेयरबजारमा सूचीकृत समूहमध्ये जीवन बीमा, म्युचुअल फण्ड तथा व्यापार समूहको परिसूचक सकारात्मक रहेका छन् ।

अरु बाँकी सबै समूहको परिसूचकमा गिरावट आएको छ । सबैभन्दा धेरै अन्य समूहको परिसूचक २ प्रतिशतले घटेको छ । युनियन हाइड्रोपावर लिमिटेड, क्रेष्ट माइक्रो लाईफ इन्सुरेन्स लिमिटेड तथा एनआईविएल स्टेवल फण्डका सेयरधनीले सबैभन्दा बढी कमाएका छन् ।

सबैभन्दा बढी गुमाउनेमा भने एसियन हाइड्रोपावर लिमिटेड, हिमालयन रि–इन्सुरेन्स लिमिटेड तथा नारायणी डेभलपमेन्ट बैंकका सेयरधनी रहेका छन् ।