नबिल बैंकको नाफा करिब ८ अर्ब, लाभांश क्षमतामा पनि सुधार

काठमाडौं, साउन २० ।  नेपालको अग्रणी वाणिज्य बैंक नबिल बैंकले आर्थिक वर्ष २०८२/८३ को चौथो त्रैमाससम्मको अपरिष्कृत वित्तीय विवरण सार्वजनिक गर्दै नाफा, सञ्चालन आम्दानी तथा लाभांश क्षमतामा उल्लेख्य सुधार गरेको जानकारी दिएको छ ।

बैंकले सार्वजनिक गरेको विवरणअनुसार समीक्षा अवधिमा खुद नाफा ३३.५० प्रतिशतले बढेर ७ अर्ब ९० करोड ५७ लाख रुपैयाँ पुगेको छ । अघिल्लो आर्थिक वर्षको सोही अवधिमा बैंकले ५ अर्ब ९२ करोड २१ लाख रुपैयाँ खुद नाफा आर्जन गरेको थियो ।

बैंकको नाफा वृद्धिमा खुद ब्याज आम्दानी बढ्नु र कर्जा नोक्सानी व्यवस्था (इम्पेयरमेन्ट चार्ज) घट्नु मुख्य कारण बनेको छ । अघिल्लो आर्थिक वर्षमा १६ अर्ब ३२ करोड रुपैयाँ रहेको खुद ब्याज आम्दानी बढेर १७ अर्ब ९२ लाख रुपैयाँ पुगेको छ ।

त्यसैगरी, बैंकको इम्पेयरमेन्ट चार्ज ४ अर्ब २० करोड रुपैयाँबाट घटेर २ अर्ब ६७ करोड रुपैयाँमा सीमित भएको छ । यसले बैंकको सञ्चालन नाफा २५.२२ प्रतिशतले बढाएर ११ अर्ब ५६ करोड ४५ लाख रुपैयाँ पु¥याएको छ । अघिल्लो आर्थिक वर्षमा सञ्चालन नाफा ९ अर्ब २३ करोड ५४ लाख रुपैयाँ रहेको थियो ।

वित्तीय सूचकहरूमा आएको सुधारसँगै बैंकको लाभांश वितरण क्षमता पनि बढेको छ । नियामकीय समायोजनपश्चात् बैंकको कुल वितरणयोग्य नाफा ५ अर्ब १६ करोड रुपैयाँ पुगेको छ । यस आधारमा बैंकको प्रतिशेयर वितरणयोग्य नाफा १९ रुपैयाँ १० पैसा पुगेको छ ।

समीक्षा अवधिमा बैंकको निक्षेप र कर्जा दुवै दोहोरो अंकले बढेका छन् । ग्राहक निक्षेप १२.९५ प्रतिशतले बढेर ५ खर्ब ९२ अर्ब ५५ करोड रुपैयाँ पुगेको छ भने कर्जा प्रवाह १२ प्रतिशतले बढेर ४ खर्ब ६० अर्ब ३१ करोड रुपैयाँ पुगेको छ । बैंकको कुल सम्पत्ति १५.३८ प्रतिशतले वृद्धि भई ७ खर्ब ३४ अर्ब ७३ करोड रुपैयाँ पुगेको छ ।

बैंकको चुक्ता पूँजी ३२ अर्ब ५ करोड ६९ लाख रुपैयाँ रहेको छ भने सञ्चित नाफा र विभिन्न जगेडा कोषसहित कुल इक्विटी ७१ अर्ब ९० करोड ६५ लाख रुपैयाँ पुगेको छ ।सम्पत्ति गुणस्तरतर्फ पनि बैंकले सुधार देखाएको छ । खराब कर्जा अनुपात (एनपीएल) ४.४८ प्रतिशतबाट घटेर ४.२० प्रतिशतमा झरेको छ भने नेट एनपीएल ०.५८ प्रतिशतमा सीमित रहेको छ ।

चौथो त्रैमाससम्म बैंकको प्रतिशेयर आम्दानी (ईपीएस) २८ रुपैयाँ ३६ पैसा, प्रतिशेयर नेटवर्थ २४७ रुपैयाँ २८ पैसा, प्रतिशेयर कुल सम्पत्तिको मूल्य २ हजार ७१५ रुपैयाँ ५० पैसा तथा तरलता अनुपात २८.८७ प्रतिशत कायम भएको छ ।

बैंकले सार्वजनिक गरेको वित्तीय विवरणले नाफा, वितरणयोग्य मुनाफा र सम्पत्ति गुणस्तरमा सुधार देखिएकाले आगामी साधारणसभाबाट आकर्षक लाभांश वितरण गर्ने क्षमता थप बलियो भएको संकेत गरेको छ ।