बुधबार नेप्से परिसूचक ४.७९ अंकले बढ्यो

काठमाडौं, साउन २० । लगातार दुई दिन घटेको सेयरबजार बुधबार समहालिएको छ । आज सेयरबजार परिसूचक नेप्से ४.७९ अंकले बढेर २ हजार ६६७.९७ विन्दुमा कायम भएको हो । आज ‘क’ वर्गका कम्पनीहरुको कारोबार मापक सेन्सेटिभ इन्डेक्समा भने गिरावट आएको छ । आज सेयरबजारमा ३५० कम्पनीका सेयर कारोबार भएका छन् । यी मध्ये १२२ कम्पनीका सेयरमूल्य बढेका छन् भने १४३ कम्पनीका सेयरमूल्यमा गिरावट आएको छ । अरु बाँकी ११ कम्पनीका सेयरमूल्य स्थिर रहेका छन् ।

आज सेयरबजारमा १ करोड ६७ हजार ७३२ कित्ता सेयर ६१ हजार २८६ कारोबारबाट ४ अर्ब ४० करोड ९८ लाख ८६ हजार रुपैयाँमा किनबेच भएको छ । कारोबार रकम मंगलबारको तुलनामा ८.३२ प्रतिशतले बढी हो । मंगलबार ४ अर्ब ७ करोड ८ लाख ५४ हजार रुपैयाँ बराबरका सेयर कारोबार भएका थिए । आज सेयरबजारमा सूचीकृत समूहमध्ये होटेल तथा पर्यटन, जलविद्युत, उत्पादनशील तथा प्रशोधन, व्यापार तथा अन्य समूहका परिसूचक सकारात्मक रहेका छन् । सबैभन्दा धेरै व्यापार समूहको परिसूचक १.६० प्रतिशतले बढेको छ ।

यस्तै, वाणिज्य बैंक, विकास बैंक, वित्त, लगानी, जीवन बीमा, लघुवित्त, म्युचुअल फण्ड तथा निर्जीवन बीमा समूहका परिसूचक ओरालो लागेका छन् । सबैभन्दा धेरै विकास बैंक समूहको परिसूचक ०.५० प्रतिशतले घटेको छ । सोलु हाइड्रोपावर लिमिटेड, शिखर पावर डेभलपमेन्ट कम्पनी, रिडी पावर कम्पनी, वुद्धभूमि नेपाल हाइड्रो पावर कम्पनी तथा सिनर्जी पावर डेभलपमेन्टका सेयरधनीले सबैभन्दा बढी कमाएका छन् ।

सबैभन्दा बढी गुमाउनेमा भने एभरेष्ट कलर लिमिटेड, मञ्जुश्री फाइनान्स लिमिटेडका डिवेञ्चरमा लगानीकर्ता, कामना सेवा विकास बैंकका डिवेञ्चरमा लगानीकर्ता, प्रभु बैंकका डिवेञ्चरमा लगानीकर्ता तथा सिद्धार्थ इक्वीटी फण्डका लगानीकर्ता रहेका छन् । कारोबार रकमका आधारमा सोलु हाइड्रोपावर लिमिटेड अग्रस्थानमा रहेको छ । यस कम्पनीका ५८ करोड १० लाख ८० हजार रुपैयाँ बराबरका सेयर किनबेच भएको छ । यस्तै, कारोबार भएका सेयर संख्याको आधारमा रिडी पावर कम्पनी पहिलो अवगस्थामा छ । यस कम्पनीको ९ लाख ३१ हजार ४५३ कित्ता सेयर किनबेच भएको छ ।